ඒ මහතා මේ බව ප්‍රකාශකර සිටියේ කොළඹ ආරක්ෂක සේවා විද්‍යාලය ආරම්භකර වසර 10ක් පිරීම නිමිත්තෙන් එම විද්‍යාලයේ අද (29) පැවති "දසවසක අභිමන්" අධ්‍යාපනික ප්‍රදර්ශණය විවෘත කිරීමේ අවස්ථාවට එක්වෙමිනි.
ලෝකයේ වේගවත් සංවර්ධනයක් අත්පත් කරගත් සෑම රටක්ම පාසල් අධ්‍යාපනය කෙරෙහි විශේෂ අවධානයක් යොමු කළ බව ආරක්ෂක රාජ්‍ය අමාත්‍ය රුවන් විජයවර්ධන මහතා පැවසීය.
එමෙන්ම අමාත්‍ය රුවන් විජයවර්ධන මහතා සඳහන් කළේ විභාග පමණක් ඉලක්ක කරගත් අධ්‍යාපන ක්‍රමවේදය වෙනස්කර දරුවන්ගේ විවිධ දක්ෂතා සඳහා අවස්ථා ලැබෙන යහපත් අනාගතයක් නිර්මාණය වන සැලසුම් සහගත වැඩපිළිවෙළක් කඩිනමින් සකස් විය යුතු බවයි.
එහිදී වැඩිදුරටත් අදහස් දැක්වූ ආරක්ෂක රාජ්‍ය අමාත්‍ය රුවන් විජයවර්ධන මහතා,
දශක තුනක ශාපලත් ත්‍රස්තවාදය නිමාකිරීමට ජීවිත පූජාකළ සහ රණක්ෂයට පත්වූ මෙන්ම රට නිදහස් කර ගැනීමට සක්‍රීය ලෙස දායක වූ රණවිරුවන්ගේ දූ දරුවන් වෙනුවෙන් මේ ආරක්ෂක සේවා විද්‍යාලය මීට දශකයකට පෙර ආරම්භ කළා. එය අගය කළ යුතුයි. පසුගිය කාලේ රණවිරුවන්ගේ දරුවන්ට ජනප්‍රිය පාසල් වලට ඇතුළත් කිරීමට විවිධ දුෂ්කරතා තිබුණා. මේ විද්‍යාලය නිසා රණවිරුවන්ගේ දරුවන්ට විශේෂ අවස්ථාවක් ලැබුණා. පියවරෙන් පියවර දශකයක් වැනි කෙටි කාලයක් ඇතුළත ආරක්ෂක සේවා විද්‍යාලයේ දරුවන් විෂයය හා විෂය භාහිර ක්‍රියාකාරකම් තුළින් විශේෂ දක්ෂතා දැක්වීම මාගේ ඇගයීමකට ලක්කරන්න කැමතියි.
නවීන සංවර්ධන ලෝකයට ගමන් කිරීම සඳහා විධිමත් හා සැලසුම් සහගත අධ්‍යාපන ක්‍රමවේදයක් සකස් විය යුතුයි. දියුණු වූ සෑම රටක්ම ඒ පිළිබඳ විශේෂ අවධානයක් යොමුකළා. අප රටක් විදියට අධ්‍යාපන අංශයේ නූතන අවශ්‍යතාවයන්ට සරිලන අයුරින් විෂය මාළා, විභාගක්‍රම සකස් කිරීම අත්‍යාවශ්‍ය කරුණක්.
විභාග පමණක් ඉලක්ක කරගත් අධ්‍යාපන ක්‍රම වෙනුවට අධ්‍යාපනඥයින්ගේ උපදෙස් ඇතුව විෂය මාළා සකස්විය යුතුයි. අපේ අගමැතිතුමා වගේම අධ්‍යාපන ඇමතිතුමා , අධ්‍යාපන අමාත්‍යාංශය ඒ පිළිබඳ විශේෂ අවධානය යොමුකර තිබීම සතුටට කරුණක්. අධ්‍යාපන විෂය සාම්ප්‍රදායික ක්‍රමවේද අනුව ගමන් කලහොත් එයින් අනාගත අවශ්‍යතාවන්හිදි මතුවන විවිධ අභියෝගයන්ට රටක් ලෙස මුහුණදීමට අපට බැරිවෙනවා. දරුවන්ට දැන් තිබෙන විභාග බර අඩුකරමින් දැනුම ආකල්ප කුසලතාවලින් පිරිපුන් අනාගත පරපුරක් නිර්මාණය කිරීමට මැදිහත්වීම විද්වතුන් සියළුදෙනාගේම විශේෂ වගකීමක් වනවා.
අධ්‍යාපනය තුළින් ලබන දැනුම කිසිවෙකුටත් සොරාගන්න බෑ. අධ්‍යාපනය ලැබීම තමයි දරුවන් අනාගතයට සිදුකරගන්නා හොඳම ආයෝජනය වන්නේ. මේ දරුවන්ගේ දෙමව්පියන් වගේම ගුරු මහත්ම මහත්මීන් සුවිශේෂ කැපවීමක් සිදුකරනවා. ඒ නිසා පාසල් දරුවන් සියලුදෙනා කැපවීමෙන් අධිෂ්ඨානයෙන් අධ්‍යාපනය ලැබිය යුතුයි. දැයේ අනාගතය භාරගන්න රට ගැන සැබෑ හැඟීමක් ඇති පරපුරක් බිහිවුනොත් මේ රට තවත් ලස්සන කරන්න පුළුවන්.
වර්තමානය වන විට රටතුළ සහජීවනය සහ සමගිය , සංවර්ධනය ගොඩනැඟෙමින් තිබෙනවා. ඒවාට බාධා කරන විවිධ බලවේග වරින් වර මතුවනවා. ඒවාට සාර්ථකව මුහුණදෙමින් රටක් ලෙස අපි ඉදිරියට යා යුතුයි. රට සාමකාමී කිරීමට උදාර මෙහෙවරක නිරතවූ රණවිරුවන්ට වගේම ඔවුන්ගේ දූ දරුවන්ටත් රජයක් ලෙස අපේ වගකීම් සහගත මැදිහත්වීම නිරතුරුව ඉදිරියටත් සිදුකරනවා. මේ ආරක්ෂක සේවා විද්‍යාලය ගොඩනැඟුවේ රණවිරුවන්ගේ දහඩියෙන් සහ ශ්‍රමයෙන්. වර්තමානයේ මෙන්ම අනාගතයේදීත් මේ පාසල දියුණු කිරීමට හැකි සෑම සහයෝගයක්ම ආරක්ෂක අමාත්‍යාංශය ලෙස අප ලබාදෙනවා. දස වෙනි සංවත්සරයට එළඹි ආරක්ෂක සේවා විද්‍යාලය තුළින් රටට දැයට සේවාවන් සිදුකළ හැකි වැදගත් පරපුරක් බිහිවේවායි ප්‍රාර්ථනා කරන බව ආරක්ෂක රාජ්‍ය අමාත්‍ය රුවන් විජයවර්ධන මහතා පැවසීය.
No comments:
Post a Comment